Domingo, 02 Diciembre 2018 00:00

Cloe Iglesias, campioa de Europa Cadete, mentres que Eduardo Rejo acada o bronce

Written by
Rate this item
(0 votes)

As medallas galegas fixéronse esperar ata a última xornada do Europeo Cadete, pero hoxe houbo dúas para os nosos deportistas. Cloe Iglesias (-59 quilogramos, Patiño Moaña) proclamouse campioa de Europa tras vencer nos cinco combates disputados, mentres que Eduardo Rejo (-61 quilogramos, Mace Sport) foi bronce.

 Cloe Iglesias (-59 , Patiño Moaña) tivo unha traxectoria impecable. Comezou contra a británica Amy Bone, á que venceu 3-8. Houbo algúns nervios na galega, pero foi quen de liquidalo con oficio e saber estar. Posteriormente superou a Julia Voll (Alemaña), nun combate no que foi de menos a máis, para finalizar cun dominio moi rotundo (4-21). Nos cuartos de final gañou a Justyna Kowalkowska (Polonia) A polaca comezou moi agresiva, pero Cloe soubo esperala e con varias anticipacións logrou un resultado avultado e cómodo (15-4).

 Pero a deportista do Patiño quería máis e seguiu firme na busca do título. Na semifinal venceu a Vesna Ajdukovic (Serbia), cunha superioridade impresionante, xa que ía 20 puntos arriba no segundo asalto (22-1 final) e logrou así plantarse na gran final contra a rusa Anna Lobashova. Outra vez Cloe estivo perfecta e controlando o combate en todo momento. Só o ímpeto final da rusa maquillou o marcador, para rematar cun 13-11 final, que non reflicte exactamente o visto no tapiz. Título europeo para Cloe Iglesias!

Eduardo Rejo (-61, Mace Sport) comezou a competición contra o francés Lawrence Felicite ao que superou, nun combate vibrante, que non se decidiu ata o final (24-29). Nos cuartos de final gañou a Berken Pazar noutra loita espectacular e axustada (38-40). Na semifinal o galego perdeu contra Bassem Amri (Francia). O pontevedrés non foi capaz de frear as accións do francés co puño e finalmente caeu por 20-9. Gran traballo e magnífica medalla de bronce para Rejo!

O sábado competiron Ainoha García (-55, Couto), que quedou ás portas da medalla, e Irene Montemuíño (-51 quilogramos, Natural Sport Riveira), que perdeu na primeira rolda.

 Ainoha García comezou a competición contra Radina Bortisova (Bulgaria) A nosa deportista comezou un pouco atenazada e ía por detrás no marcador, pero no último asalto deixou atrás a presión e logrou remontar ata acadar unha vitoria bastante ampla (20-8). En segunda rolda a rival foi a rusa Anastasiia Egarmina. A galega sufriu un pouco, pero finalmente logrou impoñerse no punto de ouro (0-3), tras finalizar o combate empatadas. Nos cuartos de final esperaba a súa compañeira da selección española Nerea Fernández e nesta ocasión, Ainoha non puido con ela e perdeu por 5-13.

 Peor sorte tivo Irene Montemuíño que caeu no primeiro combate contra a grega Ifigeneia Liakata por 13-21. Irene fixo un magnífico combate e foi en varias ocasións por diante no marcador, pero a grega remontou e cando a galega arriscou, aproveitou para aumentar as distancias.

 Julián Feijoó (-33 quilogramos, Couto), que foi o primeiro en competir no Europeo, caeu na primeira rolda do torneo. O deportista do Couto enfrontouse a Ucraína, un rival forte e dinámico, que controlaba moi ben as técnicas de xiro, e coas que sorprendeu no primeiro asalto ao galego. No segundo asalto, a presión e a ansiedade atenazou a Julián e o combate escapouse a favor de Maksym Manenkov, que finalmente foi prata neste peso.

Read 419 times
Comunicación Fegatae

Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.