Eirim Vaamonde (Yidam CEIP Balaídos) rematou na sétima posición na proba de freestyle individual feminina + 18 do Mundial de Técnica e Freestyle, que se está a disputar en China-Taipei (15 ao 18 de novembro). Nesta primeira xornada de competición este foi o mellor resultado dos participantes galegos. Tamén participaron Elena Varela e Alejandro Losada Rodríguez (Neka) en parella 1 e Gabriel Tembrás (Moodukwan) en júnior, pero non acadaron o pase á final.

 Eirim Vaamonde fixo unha magnífica competición e iso que todo se lle puxo en contra antes de comezar o seu exercizo. Na semifinal, cando xa estaba sobre o tapiz, equivocaron a música e en vez de poñerse a que correspondía á proba individual, tiñan a de parella. Así que Eirim tivo que saír correndo a buscar a música nun pen e entregarlla á organización e despois de todo iso, competir. Pero en vez de descentrarse, a viguesa creceuse e fixo unha das súas mellores actuacións, arrancando grandes ovacións do experto público. Así, logrou entrar na final na quinta posición, moi preto das medallas.

 Pero na final, a serie non foi tan exquisita como a primeira. Cometeu un par de erros e ante rivais desta calidade non se pode fallar, polo que baixou á sétima posición. Moi bo traballo.

 Na modalidade de técnica, hoxe tamén participaron Alejandro Losada e Elena Varela (Neka) en parella 1. Quedaron no posto 12º do seu grupo de 15, polo que non puideron meterse na final. Ambos son moi novos (19 anos) e este era o seu primeiro Mundial, polo que hai que valorar que mantiveron a calma e competiron a un bo nivel. Era unha categoría moi complicada, na que venceu Korea e con Tailandia na segunda posición.

 Por último, sinalar que Gabriel Tembrás (Moodukwan) participou en júnior individual na modalidade de técnica, pero non puido clasificarse para a final por moi pouco. Quedou décimo na súa serie e pasaban 8 á final, pero gran traballo do galego.

 Este Mundial, con récord de participación, é sen dúbida unha cita moi dura. Celébrase en China-Taipei, polo que hai unha enorme afluencia de competidores asiáticos, os grandes dominadores destas modalidades. Proba diso é o feito de que Korea gañou as catro categorías de técnica nas que participou e en freestyle quedou segundo.

 Mañá celebrarase a segunda xornada do campionato e teremos en acción a varios galegos: Os cadetes Alejandro Fernández (Escola Lucense) e Tomás Fernández (Kiap), en trío cadete; Noelia Pérez, Vanesa Ortega e Sonia Pérez (Hebe), en trío 2; Nerea Alamancos (Tao), en sénior 2 individual e Manuel Paz (Hebe), en freestyle -17 individual.

Galicia contará cunha nutrida e destacada participación no Mundial de Técnica e Freestyle que se desenvolverá en China-Taipei do 15 ao 18 de novembro. A expedición galega xa está en Taiwán, despois de máis de 24 horas de viaxe.

Esta cita mundialista será moi complicada, ao celebrarse en China-Tapiei, o que permitirá unha maior afluencia de deportistas orientais, que son os grandes especialistas nesta modalidade. Ademais, será un Mundial de récords: 1.274 deportistas, 248 técnicos e 59 países rexistrados. Pero nada pode coa ilusión dos nosos taekwondistas viaxan coa intención de facer un gran papel, despois de moitos meses de preparación. A última cita tivérona hai un par de semanas no Open de Madrid, onde amosaron un bo nivel.

O Tao de Vigo é o club galego con máis representación con oito deportistas. Samuel Meilán e Nerea Alamancos competirán en sénior 2 individual (cada un de eles) e xuntos en parella 2. Ambos xa conseguiron grandísimos resultados internacionais (medallas tanto en Europeo como Mundial). Ademais, o Tao leva a Celia García, que participará en freestyle -17 individual e o quinteto formado por Samuel Alves, Alejandro Losada, Manuel Rodríguez, Alicia Pérez e Laura Vázquez.

O Hebe de Moaña tamén despraza a un gran número de taekwondistas, sete en total. Contaremos co trío 2 feminino formado por Noelia Pérez, Vanesa Ortega e Sonia Pérez, e o trío júnior con Manuel Paz, Gabriele Santomé e Álvaro Portela. Ademais Manuel Paz tamén participará en freestyle individual e en parella freestyle -17 xunto a Bárbara Di-Martino.

O Neka e o Yidam CEIP-Balaídos contan con dous representantes cada un. Elena Varela e Alejandro Losada Rodríguez (Neka) están clasificados para parella 1, mentres que os deportistas do Yidam competirán en freestyle. Eirim Vaamonde (Yidam) participará en freestyle individual +18 e tamén en parella +18 xunto a Aitor Priego.

Gabriel Tembrás (Moodukwan) competirá en técnica en júnior individual e en parella, mentres que Marcos Silva (do Mace Sport) farao en freestyle individual +18.

Os máis pequenos da convocatoria galega son os cadetes Alejandro Fernández (Escola Lucense) e Tomás Fernández (Kiap). Alejandro terá dobre actuación, en individual en trío cadete, onde tamén compite Tomás Fernández.

Tania Castiñeira (Hebe, +73 quilogramos) proclamouse hoxe subcampioa de Europa sub 21 en Varsovia (Polonia), sumando así a segunda medalla (ambas femininas) para Galicia neste campionato. A galega fixo unha competición espectacular, dominando e controlando todos os combates menos na final, onde non estivo cómoda.

 Tania, a pesar da súa idade, xa chegaba con bastante experiencia internacional ás súas costas (foi 5ª no Europeo júnior 2017 e ouro, na Copa Presidente de Atenas 2018, por exemplo) e con gañas de acadar unha medalla. A nosa deportista comezaba o Europeo fronte á rusa Ella Borisova, que era unha das favoritas para facerse co título. Pero enfronte estaba Tania que non lle deu opción algunha. Dominou o combate dende o inicio e  gañou por 3-5.

 En cuartos de final esperaba a alemá Sara Di Sinno, e novamente Castiñeira estivo imparable. Foi tremendamente superior e venceu 20-10. A medalla xa estaba asegurada, pero a deportista do Hebe ía paso a paso. E agora tocaba a semifinal contra Natalie Lauridsen (Dinamarca). Novamente Tania levou todo o peso do combate e sempre foi por diante no marcador, para rematar cun 6-4, que a mete na gran final contra a francesa Solène Avoulette.

 Neste último combate, Castiñeira non estivo cómoda, tal e como explicou, xa que era unha rival moi alta e non atopaba a forma de entrar: “Custábame moito achegarme para puntuar e tíñame moi ben pillada a garda”. Pese a todo estivo metida na final ata o último asalto: “Fumos 1-0 ata o último asalto, que me meteu un bandal. E nos últimos segundos, ao tentar facer eu unha acción con xiro ao casco para remontar, logrou impactar arriba”. Ao final, 6-0, e magnífica medalla de prata para Tania Castiñeira.

 O venres foi Sara Cortegoso (Mace Sport) quen nos deu a primeira alegría para o taekwondo galego no Europeo sub 21. A pontevedresa, que fixo un torneo excepcional, acadou a medalla de bronce en -49 quilogramos e estivo moi preto de meterse na gran final.

Sara Cortegoso (Mace Sport) logrou hoxe a primeira medalla para o taekwondo galego no Europeo sub 21. A pontevedresa, que fixo un torneo excepcional, acadou a medalla de bronce en -49 quilogramos e estivo a piques de meterse na gran final.

Sara Cortegoso (-49, Mace Sport) comezaba a competición contra Hilal Kaya (Turquía), unha complicada rival, pero a pontevedresa non lle deu a máis mínima opción, dominando o combate dende o inicio para así lograr a vitoria cun contundente 12-0.

En segunda rolda esperaba a chipriota Athina Evangelou e tocou sufrir un pouco. E iso que de inicio a galega logrou escaparse no marcador de forma moi clara, pero despois a nosa deportistas cometeu un par de erros que permitiu a Avengelou achegarse no marcador, ata rematar nun apertado  (9-10).

Desta forma chegou aos cuartos de final, o pase decisivo para as medallas, onde a rival era Dominika Hronova (República Checa). E Sara volveu a lucir. No comezo estivo bastante axustado, pero logrou facer unha pequena brecha no marcador e así levou o combate moi controlado ata o final. A pesar de que as distancias non eran moi longas, a vitoria non corría perigo algún.

A medalla de bronce xa estaba asegurada, pero Sara quería máis e enfrontou a semifinal coa rusa Alena Mironyuk coa máxima ilusión. Sara foi por diante no marcador durante case todo o combate, pero equivocouse nos xiros, algo que aproveitou a rusa para darlle a volta e conseguir a vitoria. Moi grande Sara!

Adrián Pombo (-80 quilogramos, Natural Sport Riveira) foi o primeiro en saír ao tapiz. Tiña enfronte a un rival moi duro, o ruso Stanislav Melnik, medallista mundial cadete, campión de Europa cadete (2015) e medalla de ouro este ano na Copa Presidente de Atenas e no Open de Polonia. E todo saíu mal para o galego dende o inicio. No primeiro asalto, o ruso logrou unha dobre acción, con patada a cara, que lle permitiu escaparse de forma clara no marcador e xa Pombo non tivo opcións de achegarse. Ao final, 23-7.

Tania Castiñeira (+73, Hebe) será a última galega en competir no Europeo sub 21 de Polonia. Teremos que esperar ao domingo para ver á nosa representante.

Pasou a primeira xornada do Europeo sub 21 de Polonia sen medallas para as representantes galegas. As primeiras en competir foron Alma Pérez e Arlet Ortiz, ambas en -53 quilogramos. Arlet gañou dous combates e perdeu no terceiro contra Inese Tarvida, que ao final logrou o título europeo. Pola súa banda, Alma caeu no primeiro combate ante a eslovaca Briskarova.

Arlet Ortiz (Mat’s) foi a primeira en competir no peso de -53 quilogramos, no que participaban 38 taekwondistas, e cun altísimo nivel. En primeira rolda tivo como rival á portuguesa Patricia Frois e Arlet foi moi superior, para gañar por un contundente 11-5: “Sentinme moi cómoda e probei outras cousas que me serviron para os demais combates”, explicou. A continuación esperaba a grega Paraskevi Paitaridou e foi un combate moito máis pechado e duro. Comezou puntuando a galega (2-0) e foi arriba ata o final, no que recibiu unha amonestación e pechou a vitoria cun 2-1 final.

 No terceiro combate enfrontouse á lituana Inese Tarvida, unha das favoritas xa que é bronce mundial absoluto. O combate estivo bastante axustado ata o segundo asalto, pero no terceiro, a galega tivo que arriscar para recortar distancias, e isto foi aproveitado por Tarvida para ampliar o marcador. Ortiz está satisfeita, “sentinme moi ben en todos os combates e estou contenta”.

Alma Pérez (Suh Sport) enfrontouse en primeira rolda con Gabriela Briskarova (Eslovaquia), unha rival dura e cun gran currículo. A galega chegou a estar empatada no último asalto, pero aí Briskarova amosou a súa experiencia: Escapóuseme nos últimos 30 segundos, nos que me puntuou varias veces”. O resultado final foi de 7-11. Pese a todo, Alma valora o feito de disputar un Europeo: “Aínda que non puiden achegarme ás medallas, quédome coa experiencia de pelexar nun campionato desta magnitude”.

Galicia contará con cinco representantes (Adrián Pombo, Alma Pérez, Arlet Ortiz, Sara Cortegoso e Tania Castiñeira) no Campionato de Europa sub 21, que se celebrará do 8 ao 11 de novembro en Varsovia (Polonia). Os nosos deportistas viaxaron onte en dirección a Varsovia xunto ao resto da delegación española.

As primeiras en competir serán Alma Pérez (Suh Sport) e Arlet Ortiz (Mat’s), ambas no peso -53 quilogramos. Hoxe pola mañá realizaron a pesada e esta tarde coñecerán ás súas primeiras rivais.

Ambas son moi novas (Alma ten 16 anos e Arlet, 17), pero  ambas están sorprendendo a todos cos seus resultados. Este será o primeiro Europeo para Alma, que vai sen medo pero sen presión: “Atópome nun bo momento de forma e veño sen ningún tipo de presión polos resultados. É o meu primeiro Europeo coa selección nacional e o nivel é moi alto así que só vou coa ilusión de poder facer un bo papel”.

Pola súa banda, Arlet xa conta con bastante experiencia a pesar da súa idade: “Neste Europeo quero realizar cousas novas que estiven practicando estes últimos meses, porque cara ao absoluto creo que teño que ter máis recursos. Penso que estou ben, rápida e forte, pero non só depende de min. Neste Europeo hai moitísimo nivel e non dunha ou dúas competidoras. Todas son moi boas e poden gañar”, indicou.

Sara Cortegoso (-49, Mace Sport) sairá ao tapiz o venres e con boas sensacións, a pesar de que non coñece as rivais do seu peso: “Síntome ben polo que as miñas expectativas neste campionato son as de facer un bo papel, sacar o mellor de min e, se é posible, conseguir medalla”, manifestou a pontevedresa.

Tamén o venres será o momento para Adrián Pombo (-80 quilogramos, Natural Sport Riveira), que se amosa confiando: “O meu obxectivo para o Europeo é traerme o ouro a casa. Penso que estou nuns dos meus mellores momentos deportivos e penso que será  unha boa oportunidade para demostralo e dar o salto que me levo esixindo desde xa hai un tempo. Os meus principais rivais son algúns rusos medallistas europeos en  júnior e un turco (medalla no Europeo  sub 21)”. Sabe que non será sinxelo pero “se te enfrontas aos mellores e gañas, a gratificacion do traballo será moito máis reconfortante”. O pasado ano, Pombo quedou a só un paso das medallas no Europeo júnior.

Tania Castiñeira (+73, Hebe) será a última en competir, o domingo. A galega enfronta a cita con optimismo e ambición: “As miñas sensacións para este campionato son moi boas. Hai rivais coñecidas,  coas que xa competín e imos enfrontar o campionato da mellor maneira posible para conseguir esa medalla”. Tania foi quinta o pasado ano no Europeo júnior.