O sábado 19 de maio celebrarase en Outes (Pavillón Municipal da Serra de Outes) a final galega de taekwondo escolar nas modalidades de combate e exhibición, cunha participación total de 480 deportistas e 43 árbitros.

A final de exhibición -categorías infantil (deportistas nados entre os anos 2006 e 2009) e cadete (nados entre os anos 2002 e 2009)- comezará ás 10:00 horas. Cada equipo está composto por entre 6 e 9 integrantes. Na exhibición preséntase un programa coreográfico con música, na que se combinan  movementos, defensa persoal e acrobacias. Ademais, na categoría cadete está en xogo a clasificación para o Campionato de España, xa que os dous primeiros clasificados serán os representantes galegos no Estatal. Na modalidade de exhibición participarán 13 equipos na categoría cadete e  14 en infantil. En  total 260 deportistas.

A modalidade de combate comezará ás 14:30 horas coa participación de 220 deportistas das categoría alevín (nados nos anos 2006 e 2007) e infantil (nados nos anos 2004 e 2005). As e os taekwondistas competirán coas pertinentes proteccións. Na categoría alevín a zona de combate queda reducida (6x6 metros) e os combates serán de dous asaltos de minuto e medio (cun descanso de 40 segundos). Non poderán participar nesta competición os medallistas ouro e prata nos Campionatos Galegos ou membros da selección galega.

Para participar na final, as e os deportistas tiveron que quedar na metade mellor clasificada nas fases provinciais celebradas a pasada fin de semana. Esta actividade está incluída no programa do Deporte Escolar Xogade, desenvolvido pola Secretaría Xeral para o Deporte en colaboración coa Federación Galega de Taekwondo. Desta forma, a organización é responsabilidade dos diferentes servizos provinciais en colaboración coa Federación e clubs nos que delega.

Unha selección mexicana júnior desprazouse a Galicia esta semana para adestrar cos rapaces e rapazas do Centro Galego de Tecnificación Deportiva, e mellorar así xuntos o nivel de competitividade.

 Esta selección, que procede de Nuevo León (México), chegou a Pontevedra o luns 14 e marchará o domingo 20, despois de seis días de traballo e convivencia cos deportistas e técnicos galegos do CGTD. Tanto o adestrador do CGTD, Jesús Benito, coma o técnico mexicano, Ismael Gómez, consideran que “este campamento permitirá a ambos grupos ter unha óptima preparación con miras aos próximos compromisos competitivos”.

 A continuación tedes o listado dos deportistas mexicanos que están a adestrar estes días en Pontevedra.