CPTO. GALEGO PROMESAS

CANGAS, 10/03/18 

Sara Cortegoso (Mace Sport) proclamouse hoxe en Valladolid campioa de España sénior de combate, nunha fermosa competición con moita emoción. Ademais, as e os deportistas galegos conseguiron 3 pratas (Iván García, Pablo Fernández Eiras e Tania Castiñeira) e 6 bronces (Alberto Verea, José Fernández Rey, Laura Lorenzo, Arlet Ortiz, Sofía Pérez e Manuel Parada).

 O ouro foi para Sara Cortegoso (Mace Sport) en -49 quilogramos, que fixo un campionato excepcional para proclamarse campioa de España absoluta. Sara tivo que facer catro combates. No primeiro venceu a Camino Nava (Castela e León) cun resultado moi amplo (22-4). Nos cuartos de final tivo que enfrontarse a Monika Pretova (Valencia) e novamente Sara arrasou (22-1). E chegaron os combates máis espectaculares. Na semifinal contra Ana de la Fuente (Madrid), fermosa loita entre as dúas deportistas, que ían intercambiando puntos para finalizar con 10-11 a favor da galega. A final, contra Blanca Palmer (Valencia), foi épica. Sara estivo case todo o combate por baixo, iso si moi apertado, ata que no último suspiro logrou poñerse por diante e no segundo final houbo un intercambio de golpes que lle deu a vitoria a Sara. Con reclamacións e vídeo replay confirmouse a vitoria galega.

 Outra das alegrías do día chegou da man de Tania Castiñeira no peso pesado, xa que no seu primeiro ano en sénior logrou a medalla de prata e so caeu ante a campioa do mundo Rosana Simón. En primeira rolda superou a Adriana Hernández (Canarias) por 5-12, para continuar eliminando en cuartos de final a Zuriñe Padilla (Euskadi) por 2-9. O combate das semifinais contra a andaluza Belén Morán foi espectacular (12-7) e así se plantou na final ante Rosana. Aínda que o resultado final parece claro (6-1) o certo foi que estivo moi igualado ata o último asalto, cando Tania arriscou.

 Iván García (-87, Mat’s) acadou a medalla de prata, tras caer na final ante Daniel Ros, nun choque que rematou con empate e que se decidiu no punto de ouro. Magnífico combate de Iván. Con anterioridade gañou a Valentín Guinea (Valencia) con rotundidade (10-2) e na semifinal a Javier Marmol (Madrid) por 6-2.

 Pablo Fernández Eiras (+87, Mat’s) acadou a terceira prata galega. O taekwondista do Mat’s venceu en cuartos de final a Sergio María (Extremadura)  por 19-13. Na semifinal enfrontouse a Borja Sánchez (Aragón) e gañou 13-11, e na final caeu ante Antonio Artal (Aragón).

 Os bronces. Outra das boas noticias chegou por outra das xoves da selección. Arlet Ortiz (-53) logrou a medalla de bronce. En primeira rolda superou á madrileña Sara Fraile nun combate moi duro que rematou empatado (0-0) e tivo que decidirse no punto de ouro. En cuartos de final superou a Natalia Ruedas (Castela a Mancha) por 5-2, nun combate moi movido no que Arlet foi case sempre por diante. En semifinais tiña como rival a Tania García, á que vencera no Campionato de España sub 21 o pasado ano, pero esta vez Tania foi mellor. No primeiro asalto ía Arlet por diante (0-1), pero o segundo asalto foi decisivo, xa que Tania logrou poñerse 7-2, e xa non houbo posibilidade de remontar para a xoven galega (9-2).

 No outro lado, medalla de bronce para un dos grandes veteranos. José Fernández Rey (-74, Natural Sport) logrou subirse ao podio. Venceu en primeira rolda a Alejandro Yuste (Madrid) por 10-1 e posteriormente eliminou a Jorge González (Baleares) por 4-1. Nos cuartos de final superou ao andaluz Álvaro Leo por un apertado 12-13 e así logrou meterse nas semifinais. Na loita por meterse na final, caeu ante Jon Cintado (1-8).

 Manuel Parada (-68, Natural Sport) tamén conseguiu unha presea de bronce. Para iso, gañou en primeira rolda a Pablo González (Canarias) con certa rotundidade (15-4) e nos cuartos foi tremendamente superior ao asturiano Juan Alonso (28-4). Na semifinal perdeu ante Marcos Caballero (Madrid) nun axustado combate (8-12).

 En -54, bronce para Alberto Verea (Maniotas). No primeiro combate vence a Yago Sánchez (Asturias) cunha gran superioridade (22-0), e no segundo deixa atrás a José Ignacio Muñoz (Valencia) por 15-7. Así garantiu a súa medalla, porque era o pase ás semifinais. O rival da semi foi o madrileño Adrián Vicente, que foi quen se proclamou campión de España ao final. Venceu ao galego por 7-2.

 Laura Lorenzo (Tao) logra o bronce en -46 quilogramos tras vencer en cuartos de final a Laura del Pozo (Castela e León) por 13-5. Na semifinal caeu ante JUdith Iñiguez (Cataluña). En -73, Sofía Pérez (Natural Sport) perdeu na semifinal contra Aida Martínez (Valencia) por 10-0.

A selección galega de técnica adulta fixo historia ao proclamarse hoxe en Valladolid campioa de España por equipos, trala suma dos resultados individuais das e dos nosos deportistas que non puideron ser mellores (catro ouros, unha prata e tres bronces). Resultados inédito xa que é a primeira vez na historia que Galicia logra proclamarse campioa de España de técnica adulto.

 Pouco máis se lle pode pedir a selección galega, que viaxou con 12 deportistas e regresou con oito medallas (catro ouros, 1 prata e 3 bronces). Desta forma, Galicia proclamouse campioa de España por equipos en técnica por vez primeira na historia.

 Os ouros foron para Alejandro Fernández (Escola Lucense) na categoría cadete, Gabriel Tembrás (Moo Duk Kwan) en júnior, Nerea Alamancos (Tao) e Samuel Meilán (Tao), en sénior 2. Ademais, en sénior 1 masculino houbo dobrete galego cos dous Alejandros Losada no podio. Alejandro Losada García, do Tao logrou a prata e o Alejandro Losada Rodríguez, do Neka acadou a medalla de bronce.

 Ademais houbo dous bronces máis, que foron para Nuria García (Escola Lucense) na categoría cadete e Vanesa Ortega (Hebe) en sénior 2, polo que compartiu podio con Nerea. Ademais, hai que sinalar que o resto tamén acadaron magníficos resultados. Así Manuel Paz (Hebe) e Bárbara di Martino (Hebe) ocuparon a quinta posición en júnior masculino e feminino, respectivamente, mentres que Tom Fernández (Kiap) tamén foi quinto na categoría cadete.

O sábado 3 de marzo celebrarase en Valladolid o Campionato de España sénior de combate e o de pomsae adulto (categorías cadete, júnior, sénior 1 e sénior 2). En ambos campionatos, Galicia contará cunha destacada participación e tentará loitar polo podio.

 Campionato de España de Combate Sénior. O combinado galego, formado por 11 mulleres e 11 homes, viaxa coa intención de acadar bos resultados, para lograr a clasificación para o Europeo, xa que o Campionato de España é unha das notas que conta para elixir aos representantes de España no Europeo de Rusia (12 de maio). O torneo, coa participación de 243 deportistas (139 homes e 104 mulleres) comezará ás 8:00 horas e celebrarase no Pavillón Pilar Fernández Valderrama en catro tapices.

 Na selección galega hai unha boa combinación de experiencia e xuventude. Deportistas cun importante curriculum tanto a nivel nacional coma internacional, coma Katia Calvar, Lúa Piñeiro ou José Fernández, que tentarán seguir no máis alto, mentres que xente máis moza coma Arlet Ortiz, Tania Castiñeira (ambas júnior) ou Javier González buscarán dar a sorpresa. E sen esquecer a Pablo Fernández Eiras (actual campión de España), Manuel Parada (prata o pasado ano) ou Iván García (prata 2017), entre outros, porque calquera pode darnos grandes momentos sobre o tapiz.

Resultados 2017. A selección galega logrou o subcampionato de España por equipos na categoría masculina, na feminina e na xeral no Campionato de España sénior disputado o pasado ano en San Sebastián de los Reyes coa participación de 239 deportistas. En total as e os nosos deportistas acadaron 14 medallas individuais (1 ouro, 2 pratas e 11 bronces). O ouro foi para Pablo Fernández Eiras (Mat’s).

 Convocatoria: http://www.taekwondogalego.com/fegatae2015/index.php/ximnasios/convocatorias/item/2539-selec-absoluta-cpto-espana-03-03-18

 Campionato de España de Técnica Adulto. Este ano celebrarase o Campionato de España de técnica adulto -cadete, júnior, sénior 1 y sénior2-, separado do resto das categorías (parellas, tríos e máster en técnica e todas as categorías da modalidade de freestyle), que se celebrarán noutra data,  aínda sen anunciar. Así Galicia viaxa con 12 deportistas e en total haberá 130 competidores. Tamén neste caso, espéranse moi bos resultados para as e os deportistas galegos. Por exemplo, Samuel Meilán (sénior 2) defende o título de campión de España, Gabriel Tembrás (júnior) foi prata o pasado ano e Nerea Alamancos (sénior 2) logrou o bronce. E non podemos esquecer a Andrea Vilas (sénior1) ou aos Alejandro Losada (do Tao e do Neka), entre outros.

 Como no caso do combate, o torneo de poomsae celebrarase a partir das 8:00 en dous tapices situados no pavillón Pilar Fernández Valderrama, polo que se disputarán as dúas competicións á vez.

 http://www.taekwondogalego.com/fegatae2015/index.php/ximnasios/convocatorias/item/2526-cpto-esp-tecnica-seleccion-03-03-18