Magníficos resultados para a selección galega no I Trofeo de Taekwondo Ciudad de Zaragoza, que se disputou hoxe coa participación de máis de 400 deportistas. Dous ouros (Arlet Ortiz e Tania Castiñeira) e dúas pratas (Unai Silva e Aitana Santomé) e primeiros por equipos na clasificación xeral júnior.

A Federación Galega de Taekwondo presentou un equipo formado por trece deportistas, dos cales dez pertencían a categoría júnior e ademais eran de primeiro ano. Polo que os resultados son aínda máis positivos.

Arlet Ortiz (-55, Mat´s) acadou a medalla de ouro tras vencer na final a Navarra (4-1) e vencer en cinco combates. Magnífica actuación da xoven deportista.

Pola súa banda, Tania Castiñeira (+63, Hebe) logrou o primeiro posto tras vencer en tres combates. Na final superou á representante de Andorra por un contundente 13-5.

Aitana Santomé (-63, Patiño) tamén destacou cun gran traballo. Despois de catro combates, perdeu na final contra Natalia Moreno (Cataluña) no punto de ouro.

E por último, destacar o campionato de Unai Silva (-63, Mace Sport) que tivo que retirarse na final contra Valencia por lesión. Antes, catro vitorias.